كورونا بالبشامل : بقلم الشاعر / سامح توكل ابوالسبح

كورونا  بالبشامل
=======
قالوا كورونا قلت زورونا
 مش هتلاقوا غير سردين

 ولافسيخ فى السوق متعفن
 ولا حواوشى حمير م الصين

 أصل حميرنا غاليه علينا
 مش بياكلها غير غاليين

والهامبورجر طعمه مسكر
لحم كلاب وقطط مساكين

عدى على الجزار هتلاقى
ودن حمار ويا الرجلين

أحلى كوارع مش هيمانع
لما يبيع لك راس كلبين

ماحنا ياعم الحاج شبعنا
م التنهيق والرفس سنين

والتهميش كلنا وسوانا
وبنتمرع بيه فى الطين

أصل كبارنا دول تاج راسنا
فى الإداريه هناك عايشين

بيقضوها مشوى وكفته
أوكافيار ويحلوا بتين

وان حد فى يوم صدع منهم
رحله علاجيه لبرلين

أصل الناس دى ياعم غلابه
حاطيننا ف خلاطهم زين

يشربوا دمى ودمك عادى
ويحلوا بأجدعها تخين
=========
بقلمى سامح توكل ابوالسبح