مولاة الدار : بقلم الشاعر / عيسى هبولة

مُـــولاَة الــــدَّارْ
°°°°°°°°°°°°°°°

يَـا سِيــدِي رَانِــي دَاوِي عْـلَـى مُــولاَة الــدَّارْ
كِــي لْگَمْــرَة يْـلَعْـبُــو فِــي ضَــوْهَـا عْـيَـالِـــي
                     
شَـادَّة فِـي حْـيَاهَـا عَـادَة مَـا تْـحَافِـي بَـالْعَــارْ
تَــفْـــهَـــمْ بَـالْـغَــمْـــزَة وْ لَــكْـــلاَمْ لَـهْــلاَلِــــي
                   
دَاخْلَـة فِـي سُــوقْ جْــواهَا مَا تْسَــوَّقْ لَخْبَــارْ
لاَ جِـــيـــتْ نَــذْكُــــر تْــقَـاهَــا مَـــا نْـسَــالِـــي
                     
لاَ كَـذَّبْـتِــي يَــا سِيــدِي جِــي وْسَــوَّلْ لَلْجَــارْ
مَــا نْـجَــامَـــلْ رَانِـــي صَـــادَقْ فِــي قْــوَالِــي
                   
عَـاقْـلَــة مَـحْـبُـوبَــة عَنْــدِي كَـتَّـاخُــذْ لَـشْــوَارْ
فِــي شْــرَاهَــا تَـعْـــرَفْ لَرْخِـيـــصْ وَ لْـغَــالِــي
                   
يَـا سِيـدِي رَانِـي عَشَّـاقْ مَنِّـي عْرَفْـتْ نَخْـتَــارْ
هَـادِيــكْ لَـحْـنِـيـنَـــة لِــي تْــرَاعِـــي حْـوَالِـــي

حَـادْگَــة وَ نْـقَـاهَـا يَـبْــرِي وْ لاَ شَعّْـلَـت الــنَّـارْ
نَـتْــشَـهَّـــى آنَـــا وْ نَـطْــلُـــبْ لِـــي حْـلاَ لـِــي

قَــادَّة فِـي شْـغُـلْهَـا تَغْلِـي وَ مْشَمْــرَة بْلَـشْـمَـارْ
مَـا تْـطِـيـب لْـگَلْـسَــة مْـعَـاهَــا حْتَـى تْسَـالِــي

سَاكْنَــة فِـي قَلْبِـي مَــنْ يُــومْ جَـمْعَتْنَـا لَقْـدَارْ
مَــنْ أَوَّلْ شُـوفَــة مَــا عْـرَفْـتْ كِـيـجْــرَى لِــي

يَـا سِيــدِي رَانِــي دَاوِي عْـلَـى مُــولاَة الـــدَّارْ
كِــي لْگَمْــرَة يْـلَعْـبُــو فِــي ضَــوْهَـا عْـيَـالِـــي

بقلــم: عيســى هبولــة
°°°°°°°°°°°°°°°°°°°°°